ViuTV《大叔的愛》上星期播完，網民繼續熱烈討論，一班配角亦都非常搶眼，其中練美娟（娟姐）飾演嘅Carmen姐獲網民讚演技自然搞笑，仲吸引到日版《大叔的愛》飾演呢個角色嘅本尊伊藤修子追劇，佢用廣東話留言，大讚佢演蒙古姑娘揸羊奶舞一幕好好笑。娟姐出post感謝本尊，仲話等佢嚟香港教佢跳揸奶舞。
伊藤修子本身非常熱愛香港文化，被封「超級香港迷」，仲自學廣東話，一年嚟四次旅行，仲試過即日來回，朝早6點由日本出發，嚟到香港10點半，回程搭夜晚12點機，十足香港人去日本咁瘋狂。佢話通常會幫襯茶餐廳同買碟，最吸引佢嘅係舊港產片同舊廣東歌，最鍾意許冠傑，多謝你咁鍾意香港呀！